يوم الجمعة كانت خطبة إمام المسجد
عن آداب دخول المسجد والجلوس فيه ...
وانا حكيت بيني وبين نفسي
شو هالموضوع اللي قاعد بحكي فيه الشيخ
وكأننا في حصة مدرسية لطلاب الصف الثالث الاساسي ...
وبلشت أسرح في مواضيع الدنيا
كي لا أسمع ما يقوله الشيخ بخطبته هذه .
وأنا سرحان في همومي ومشاكلي شفت شب راكي ظهرة على عمود في المسجد قاعد خلف خلاف ووجهه عندي .
وقاعد بنكش باظافر رجليه وبطلع هالوسخ من تحت أظافر رجليه وبكتهم على سجاد المسجد .
قلت لحالي سجاد المسجد ما بعنيني لاني انا بصلي على كرسي وبالتالي لن المس السجاد .
بس اتخيلت انه هذا الشب بس تخلص الصلاة يجن جنونه ويمد ايده بده يسلم علي عشان يحكيلي تقبل الله !.
شو رح تكون ردة فعلي !!!.
فكرت بالموضوع ولقيت افضل حل انه بس تخلص الصلاة افز بسرعه واقوم واطلع من المسجد وما اعطيه فرصه يسلم علي .
لانه لو حصل وسلم علي بجوز اقعد شهر قرفان ما أمسك الأكل بإيدي .
وبالفعل تم تنفيذ الخطة بنجاح وخرجت من المسجد وعدت الأمور على خير .
وقلت نعم نعم نعم لقد كان إمام المسجد محق بتخصيص خطبة الجمعة عن آداب المسجد وعن آداب الجلوس في المسجد وعن إحترام المسجد وعن النظافة وليته يخصص 44 خطبة اخرى عن النظافة وآداب دخول المسجد واحترام المسجد .
ليست هناك تعليقات :
إرسال تعليق