امبارح دخلت على موقع حكومتي بخدمتي ، عشان اشوف شو مطلوب لتجديد بطاقة الاحوال المدنية الذكية لبنتي …
كاتبين احضار صورتين حديثتين ودينارين رسوم ووقت انجاز المعاملة ٢٠ دقيقة .
انبسطت كثير ورحت صورت البنت واخذت معي دينارين وكلي امل انجز المعاملة خلال ٢٠ دقيقة وقلت بيني وبين نفسي خليها توخذ نص ساعة مش عشرين دقيقة …
رحت على مكتب احوال عين الباشا كونه الاقرب لي وما بكون فيه ازمة مثل مكتب صويلح .
طلع ما فيه داعي لاحضار الصور ، قلنا مش مشكلة كلهم ٣ دنانير سعر التصوير .
اخذنا دور وكان الرقم ٤٨ وكان الدور ٤٣ قلت الامور ممتازة وشكله فعلا ما رح توخذ المعاملة اكثر من نص ساعة ..
بعد انتظار اكثر من نص ساعة نادوا علينا قلنا ممتاز ، والا هاي اول مرحلة وهي اخذ بصمة العين ، اخذوا بصمة العين وحكوا استريحوا رح ينادوا عليكم …
استرحنا حوالي ساعة نادوا علينا عشان اخذ بصمة الاصابع العشرة وتكرارها لانها مرات ما كانت تزبط ، مع التصوير ، وبس خلصنا اخذ بصمات الاصابع حكوا استريحوا رح ينادوا عليكم عشان تستلموا الهوية ، استرحنا اكثر من نص ساعة لحتى تم طباعة واستخراج الهوية .
يعني العملية اخذت حوالي ساعتين ونص وكانت نفس اجراءات استخراجها لاول مرة .
حبذا لو قام موقع حكومتي بخدمتي بتعديل وقت انجاز المعاملة وكتابة الوقت حسب الازمة في مكتب الاحوال المدنية .
الفقرة الوحيدة الدقيقة كانت على الموقع هي قيمة رسوم تجديد الهوية حيث كانت دينارين .
